Цахилгаан хоёр давхар автобус үйлчилгээнд явж эхэллээ

Өнөөдрөөс 70 хүний суудалтай,  цахилгаан хоёр давхар автобус  нийтийн тээвэрт явж эхэллээ.

Уг автобус 100 хувь цахилгаанаар ажилладаг,  нэг цэнэглэлтээр хоёр өдрийн үйлчилгээнд гарах боломжтой буюу 400 км явах хүчин чадалтай.  Одоо үйлчилгээнд явж буй энгийн автобуснууд  400км явахдаа 360.000 төгрөгийн дизель түлш хэрэглэдэг. Харин уг цахилгаан автобус  35.000 төгрөгийн цахилгаанаар хоёр өдөр нийтийн тээвэрт явах боломжтой юм.

Нийтийн тээврийн шинэчлэлтийн хүрээнд энэ сард нэмж давхар цахилгаан автобус 9, энгийн цахилгаан  автобус 36-г шугаманд явуулахаар төлөвлөсөн бөгөөд тус автобусны урьдчилгаа 20 хувийг нийслэлийн төсвийн хөрөнгөөр, 80 хувийг Монголын Хөгжлийн банк болон БНХАУ-ын Хөгжлийн банкны зургаан жилийн хугацаат зээлээр авч байгаа ажээ.

Нийслэлийн ИТХ-ын Р.Дагва “Нийслэлийн нийтийн тээврийг шинэчлэх олон төсөл хөтөлбөрүүдийг хэрэгжүүлж байгаа. Үүний нэг ажил нь цахилгаан автобус нэвтрүүлэх, тэр дундаа 2 давхар цахилгаан автобусыг нэвтрүүлэх ажил юм. Хуучин автобуснуудад түлшний зардал өндөр байсан. Харин цахилгаан автобус нэвтрүүлснээр тэр зардлаа 100 хувь хэмнэнэ. Өөрөөр хэлбэл цахилгаан автобус эхний 6 жилийн дотор өөрийнхөө олсон орлогоор зээлээ төлж, дараагийн 6 жилд нь  орлого олох давуу талтай. Эдийн засгийн хувьд ч өгөөжтэй, хотын залуу иргэдэд ч сонирхолтой сайхан санагдах байх. Үүнээс гадна нийтийн тээврийг салбарыг шинэчлэх зорилгоор агаарын дүүжин тээвэр, соронзон галт тэрэгний төслүүдийг хэрэгжүүлэхээр судалгааны ажил хийгдэж байна.” гэдгийг онцоллоо.

Нийслэлийн нийтийн тээвэрт 1200 гаруй автобус үйлчилдэг. Үүний 70 гаруй хувийнх насжилт дууссан ажээ. 2009 онд улсын төсвийн хөрөнгөөр 500 гаруй автобус худалдаж авч байсан юм. Эдгээр автобуснууд 2020, 2021 онд ашиглалтын хугацаа дуусаж байгаа. Тиймээс нь нийтийн тээвэрт парк шинэчлэлт хийх зайлшгүй шаардлагатай байгаа юм.

Эх сурвалж: Нийслэлийн ИТХ-ын ХМОНХТ

Уншигчдын бичсэн сэтгэгдэлд Live1.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Side Banner

Мэдээ илгээх

Онлайн туслах