Ц.Баярхүү: “10 тэрбум төгрөгөө танай нутагт булчихлаа” гэж дарамталдаг

Архангай аймгийн Өндөр-Улаан сумын “Гурван гол” хөдөлгөөнөөс тус сумын нутагт ураны тусгай зөвшөөрөл олгож байгаа талаар өнөөдөр мэдээлэл хийлээ. Архангай аймгийн Өндөр-Удаан, Чулуут, Тариат сумын нутагт “Нуклер энержи Монголиа” ХХК нь ашигт малтмалын хайгуулын 5355Х, 5359Х тоот тусгай зөвшөөрөлтэй аж.

Энэ талаар Гурван гол” хөдөлгөөний Удирдах зөвлөлийн гишүүн Ц.Баярхүү хэлэхдээ “Бид 2011 онд тэмцэж, зогсоосон ч өнөөдөр дахин тусгай зөвшөөрлийг нь сэргээх гэж байна. Гурван сумын Засаг дарга нар зөвшөөрлийн бичиг дээр нь гарын үсэг зураагүйн төлөө “Бид 4-10 тэрбум төгрөгөө танай нутагт булчихаад байна. Та нар юугаараа төлөх вэ” гэж “Нукльер энержи Монголиа” ХХК дарамталж байна. Одоо Өндөр-Удаан, Чулуут, Тариат сумын Засаг дарга нарыг байгаль орчны нөхөн сэргээлтийн менежментийн төлөвлөгөөн дээр гарын үсэг зураагүй гэсэн шалтгаанаар шүүхэд өгсөн” гэлээ.

Мөн тэрбээр “Бид дэлхийн хөгжилтэй хөл нийлүүлэх ёстой ч бидний соёлд таарахгүй зүйлүүд байна. Түүний нэг бол уран. Дэлхийн улс, орнууд уранаас татгалзаад байхад яагаад манай улс ураныг олборлох гээд байна вэ. Ураны талаарх мэдээллийг иргэдэд маш бага өгдөг.

Уран бол маш аюултай. Хагас задрал нь л 4.5 тэрбум жил болж байж алга болдог бөгөөд хорт хавдар үүсгэж, урагт ч нөлөөлөхүйц хөнөөлтэй. Ураны хохирлыг амссан гаднын олон улс орон бий.  Иймд уран олборлох гээд байгаа байгууллага болоод зөвшөөрлийг нь өгөх гэж байгаа хүмүүс ураны талаар мэдлэг дутмаг байна гэж үзэж байна. Дээд, доод түвшиндээ ч ураны хор хохирлын талаар бага судалсан байна.Бид Засгийн газар болон Үндэсний аюулгүй байдлын зөвлөлд хандана” гэдгийг онцлов.

“Гурван гол” хөдөлгөөний тэргүүн Г.Мөнхбаяр “Архангай аймгийн Өндөр-Улаан сум бол уул нуруу, ой тайга нь байгалийн унаган төрхөөрөө байгаа цөөн нутгийн нэг. Маш олон төрлийн ан амьтантай. Ийм нутагт яагаад ураны үйл ажиллагаа явуулах гээд улайраад байгааг би ойлгохгүй байна. Хэнд, ямар ашигтай вэ? Тэр нутагт уран олборлуулахгүйн тулд бид тэмцэнэ. Уран олборлох гэдэг бол олборлох гэж байгаа гуравхан сумын биш, үндэсний аюулгүй байдалд нөлөөлөх хэмжээний асуудал.  Засгийн газар, Үндэсний аюулгүй байдлын зөвлөл одоо яаралтай арга хэмжээ авах хэрэгтэй. Ураны хайгуулын үйл ажиллагаа явуулахад хортой хоргүйг баталж өгөх ёстой. Малчид тийм тэнэг улсууд биш. Шунаад байгаа хүмүүст хэлэхэд та нар өөрсдийн хийсэн үйлийн үрээс зайлна гэж битгий горьдоцгоо. Өрөөлийн хийсэн үйлийн үрийг үүрнэ гэж битгий сандарцгаа” гэлээ.

Уншигчдын бичсэн сэтгэгдэлд Live1.MN хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Side Banner

Мэдээ илгээх

Онлайн туслах